Túristi í einn dag

Það er ýmislegt hægt að gera í Khartoum sem ferðamaður. Skelltum okkur 6 norðmenn og íslendingur yfir á eyju sem er á miðri Níl, löbbuðum þar um í tvo tíma og skoðuðum mannlífið. Fórum síðan á Grand Hotel Villa og fengum okkur lunch. Eftir það fór hópurinn, sem hafði stækkað um tvo, í bátsferð um Níl. Það var virkileg upplifun. Áin er mikilvæg áveita til ræktunar í annars skraufa þurru landi. Fórum síðan á kaffihús með konditori og íssölu og fengum okkur hressingu. Deginum lauk síðan með tveim umferðum í keiluspili (bowling), skipt í tvö lið. Í fyrstu umferð var ég efstur í mínu liði, svo að þið getið ímyndað ykkur hver hæfni hópsins annars er. En gaman var það engu að síður. Skelli inn nokkrum myndum á morgun. Okkur var annars ráðlagt að taka ekki myndir vegna þess að búið var að fá nasaþef af yfirvofandi mótmælagöngu. Ég hef hins vegar sjaldan tekið eins mikið af myndum á einum degi og í dag. Það urðu engin mótmæli og það hvíldi friðsemd yfir allri borginni. Fékk síðar að vita frá mér fróðari manni að borgarbúar nenni ekki að taka þátt í slíkri mótmæla vitleysu sem átt hefur sér stað víða annars staðar.